Ganz ehrlich… es isch liebi uf dä ersti Blick gsi. Scho als ich dis Inserat gseh ha, ha ich denkt, dass so öpis wiä du a däre Gegend nöd existiere kah. Klar häsch du din Beauty-Makel kah… Aber wer hät das ned? Also ha ich mich gfreut, dich es erstes Mal in Echt z’gseh. Und mini Erwartige sind ned entüscht worde. Chli Retro üsserlich, aber im Inneläbe modern und stylish. Und wenn du brennsch, bisch eifach nur hot. Für mich isch klar gsi, dass mir zwei zäme ghöred. So isch’s dänn au cho. Dä Aruäf isch da gsi und dä Termin gfixt worde. Ich ha alles parat gmacht und als dä Tag da gsi isch und ich s’ersti Mal i dir drin gsi bin und mir allei gsi sind…
… bin ich erstmal uf dä Bode g’läge und ha still für mich gweint.
Vorher han ich Angst davo kah, allei z’läbe. Was isch, wenn ich mich allei bim Z’nacht verschlucke und amäne Stuck Tayyeb Smash Burger i dä Luftröhre versticke? Oder en Wasserrohrbruch passiert i dä Kuchi und s’Wasser unkontrolliert i d’Wohnig flüsst? Ich hett ned emal Asatzwies gnuäg Kuchitüächer kah, um das irgendwiä uf z’fange. Oder was, wenn ich es Loch und kei Energie ha, um öper um Hilf z’bitte? All diä «Was-wäre-Wenn»’s, uf diä ich kei Antworte kah ha, händ mich igschüchteret und verunsicheret. Und es hät sini Herusforderige definitiv au kah. Moment vo dä Einsamkeit, vo dä Überforderig oder vo dä Truur hät’s gäh. Aber so desaströs wiä i minere Vorstellig sinds niä gsi. Und in Anbetracht vo däre Wahrheit, diä du mir dafür biebracht häsch, verblasset sie schnell. Denn zwische all dem Improvisiere, dem «nöd wüsse, wiä» und em zahlte Lehrgeld isch klar worde:
«Du chasch das.»
Klar… Viellicht cha mer nach Hilf frage, um diä 160×200 cm Grossi Matratze vom Schwamedingerplatz zum Garte bim Hirzebach z’bringe, anstatt sie uf emene Trolley mit zwei Gürt umrahmt 25 Minute lang allei übere z’stosse. Oder anstatt, dass mer all sini Haare us dä Haarbürste im WC-Kübeli sammlet, cha mer sie au eifach s’WC durab spüähle, sodass Unbeteiligti bim Öffne vom Kübeli nöd Angst ha münd, vomene «Tier agfalle z’werde». Ich hetti viel chöne eifacher, suberer, gschieder oder au schlicht «besser» mache chöne. Aber was ich au gmacht ha: Es isch niä Falsch gsi.
Also danke dir… für diä chline Bsüäch vom Nachbarschaftskätzli im erste Jahr, dass mengmal au eifach chli zu fasziniert vom Blick i mini Wohnig gsi isch und ich deswege liebevoll «Perversli» tauft ha. Für diä zahlrieche, gemüätliche Fernseh-Abige mit dä Familie und Fründe. Für s’Cheminee-Feur, wenn es dusse gschneit hät. Für d’Fuässbäder im Brunne grad vor dir a heisse Summertäg. Für s’Prassle vom Räge im Schlafzimmer zum Ischlafe bi «schlechtem Wetter».
… und für das, dass ich wieder zu mir Selber gfunde ha i däre Ziet.